FEDACE lanza a campaña ''Coñece os teus Dereitos''

Ao longo do mes de maio, a Federación Española de Dano Cerebral e as súas entidades membro lanzaremos nas nosas redes sociais pequenos vídeos que teñen como obxectivo dar resposta a varias cuestións que as persoas con Dano Cerebral e as súas familias teñen frecuentemente en canto ao cumprimento e defensa dos seus dereitos.

Semanalmente actualizaremos o contido desta nova cos vídeos e explicacións a cada pregunta.

1. Como inflúe a nova Lei 8/2021 aprobada o ano pasado nas persoas con Dano Cerebral e as súas familias?

A nova lexislación crea novas vías para que as persoas con Dano Cerebral poidan decidir os apoios que necesitan.

Un dos aspectos máis relevantes da Lei 8/2021 é que suprimiu a incapacitación xudicial. Anteriormente, cando unha persoa con discapacidade requiría de apoios para o exercicio da súa capacidade xurídica, iniciábase un procedemento xudicial para incapacitala.

Antes da reforma, o único mecanismo que recoñecía a lei cando unha persoa con discapacidade necesitaba asistencia ou apoio para exercitar un dereito era a incapacitación desta, o que supoñía paradoxalmente a privación da posibilidade de exercitar os seus dereitos. A nova lei dá moita maior capacidade xurídica ás persoas con discapacidade.

Para máis información sobre estas e outras dúbidas respecto a os dereitos das persoas con Dano Cerebral tes na web o seguinte material:

1. Documento elaborado por profesionais de Sarela que explican aspectos prácticos da Lei 8/2021 pola que se modifica a lexislación civil e procesal para o apoio ás persoas con discapacidade no exercicio da súa capacidade xurídica.
2. Guía de FEDACE ''Defensa de Dereitos das persoas con Dano Cerebral''.

​

2. Que podo facer se creo que a miña valoración de discapacidade non está correctamente valorada?

Contra a resolución expresa sobre recoñecemento de grao de discapacidade que dite a administración, pódese interpoñer reclamación previa á vía xurisdicional social no prazo de trinta días hábiles desde a notificación desta.

A reclamación previa -neste caso, a reclamación administrativa previa á vía xudicial- é un escrito de reclamación que se ha de presentar ante aquela administración que determinou o grao de discapacidade, con carácter previo á demanda por vía xudicial.

Nesta reclamación solicítase a modificación ou revogación dun acto administrativo. Neste caso, unha resolución negativa en materia de recoñecemento de prestacións. A reclamación previa é un trámite imprescindible para poder ir aos Xulgados do Social.

• Se na reclamación previa non nos fan caso, o seguinte é interpoñer unha demanda na xurisdición social.
• Se non estamos de acordo co grao de discapacidade que nos atribúen, para reclamar hai que interpoñer unha reclamación previa á vía xurisdicional social (regulada no art. 71 LJS) dirixida ao organismo de valoración do grao de discapacidade que corresponda.
• Temos un prazo de 30 días hábiles contados a partir do día seguinte en que recibimos a carta coa resolución para interpoñer esa reclamación previa.

3. Podo traballar tras un Dano Cerebral?

5. Que medidas de apoio existen para as persoas con Dano Cerebral?

A nova Lei 8/2021 introduce novas figuras de apoio para as persoas con discapacidade. Estas medidas de apoio prestaranse atendendo á vontade, desexos e preferencias da persoa con Dano Cerebral, axudándoa no proceso da toma de decisións e promovendo que poida exercer a súa capacidade xurídica con menos apoio no futuro.

Os apoios son todo tipo de actuacións: o acompañamento amigable, as axudas técnicas na comunicación de declaracións de vontade, a ruptura de barreiras arquitectónicas e de todo tipo, o consello ou mesmo a toma de decisións delegadas.

As medidas de apoio adoptadas serán revisadas periodicamente a través dun expediente de xurisdición voluntaria, nun prazo máximo de tres anos e, en todo caso, ante calquera cambio na situación da persoa que poida requirir unha modificación destas medidas.

A garda de feito

Sempre que sexa posible, esta figura é a ideal porque é a máis informal das institucións de apoio. Un gardador de feito é a persoa que exerce o apoio doutra con discapacidade, sen que existan medidas voluntarias ou xudiciais que se estean aplicando eficazmente.

Só será necesaria a autorización xudicial cando o gardador efectúe actuacións de representación ou ben para prestar consentimento nos actos que impliquen risco para a vida, a integridade física ou a liberdade da persoa ao seu coidado, cando esta non poida prestalo.

O defensor xudicial

Emprégase esta figura cando a persoa con discapacidade requira o establecemento de medidas de apoio con carácter ocasional, aínda que sexa recorrente, ou nos casos en que se prevea a existencia de conflito de intereses entre a persoa con discapacidade e a que está encargada de prestarlle os apoios.

A curatela asistencial

No caso de que non exista outra medida de apoio suficiente para a persoa con discapacidade, é a curatela a institución á que acudir, sempre que a persoa que necesite apoio o precise de modo continuado.

Será a resolución xudicial a que determine o alcance concreto das medidas de apoio, sen posibilidade de incluír prohibicións de dereitos, e sempre atendendo á vontade, desexos e preferencias da persoa con discapacidade, sendo o curador o asistente que deba axudar á persoa con discapacidade a que exercite os seus dereitos.

A curatela representativa

Esta figura é excepcional e acudirase a ela no caso de que sexa absolutamente imposible determinar a vontade, desexos e preferencias da persoa. Neste caso, no exercicio das funcións de apoio, terase en conta a traxectoria vital da persoa con discapacidade, as súas crenzas e valores, así como os factores que ela tomase en consideración, co fin de tomar a decisión que adoptase a persoa en caso de non requirir representación.