Noticias
20 anos en pequenos pasos
Este sábado, 19 de decembro, Sarela está de aniversario. Hai meses que as ideas que tiñamos para celebralo quedaron desbotadas pero iso non significa que renunciemos a facelo. Hoxe comezamos cun repaso de pequenos pasos que conforman o camiño percorrido nestes 20 anos. Son momentos, compromisos, formas de traballar ou proxectos que nos marcaron.
20 anos en pequenos pasos: o primeiro centro de Sarela
Fai clic na imaxe para ver o vídeo en Youtube
O primeiro, que resume o noso presidente José Balboa, é a satisfacción que supuxo en xaneiro de 2003 a apertura do primeiro centro de Sarela. Foi posible grazas á ansia dun pequeno grupo de familias autoorganizadas que querían chegar alí onde non o facían os servizos públicos á hora de atender aos seus fillos/as, maridos, esposas, nais, pais etc.
Na imaxe que abre esta peza, José Balboa está acompañado por José María Hernández Cochón e Mar Bernal, Conselleiro de Sanidade e Concelleira de Servizos Sociais respectivamente; Miguel Anxo García Álvarez, Psicólogo Clínico no Hospital Clínico Universitario de Santiago de Compostela e Javier Fernández, un mozo con dano cerebral. Cremos que esta imaxe representa o comezo dun camiño que non tería sido posible sen o traballo das familias, profesionais, persoas voluntarias e colaboradoras e a implicación institucional.
20 anos en pequenos pasos: os servizos
Fai clic na imaxe para ver o vídeo en Youtube
20 anos, cando falamos da atención ás persoas con #DanoCerebral, é un período de tempo moi longo no que pasan moitas cousas. Desde o nacemento de Sarela as necesidades das persoas usuarias mudaron por distintos motivos.
Moitas destas persoas fixéronse maiores e o perfil das que chegan agora a Sarela é diferente ao cambiar as causas que provocan o DCA (máis #ictus fronte aos traumatismos cranioencefálicos de hai uns anos). Sarela, neste tempo, medrou adaptándose ás necesidades das persoas e familias e así foi abranguendo desde a rehabilitación, a atención en centro de día, a orientación laboral etc.
Nesta segunda peza con motivo do #20AniversarioSarela, Rocío García (psicóloga/neuropsicióloga e directora de Sarela) pon voz a estas reflexións con imaxes de diferentes momentos en Sarela.
20 anos en pequenos pasos: o proxecto común
Fai clic na imaxe para ver o vídeo en Youtube
Hoxe é Marián Aramburu quen pon voz ao proxecto común que é Sarela. Marián condensa en menos dun minuto un dos proxectos que mellores momentos non ten feito pasar nestes 20 anos. O grupo de teatro, e a representación anual da obra que preparan durante varios meses, ten grandes beneficios individuais como a nivel asociativo ao fortalecer o traballo común e a convivencia. En 2020 a obra quedou en suspenso pero retomarémola cando todo pase.
20 anos en pequenos pasos: o novo centro
Fai clic na imaxe para ver o vídeo en Youtube
Nas dúas décadas de traballo de Sarela un fito fundamental foi a construción do novo centro no Castiñeiriño. Foi o resultado de moi traballo e a suma de apoios como os do Concello de Santiago cedendo a parcela, da Deputación da Coruña e do Goberno de España implicándose na súa construción e equipamento, e da Xunta de Galicia no sostemento da atención ás persoas coa ampliación do número de prazas públicas no centro de día. Así a todo, como di Ana Ruíz (terapeuta ocupacional e coordinadora do noso Servizo de Atención Especializada) o importante deste centro é o que construímos cada día nel: vidas de persoas e familias. Moitas grazas a todas elas.
