A campaña contra o copagamento supera as 450.000 sinaturas

A campaña contra o copagamento confiscatorio en materia de dependencia impulsada polo Comité Español de Representantes de Persoas con Discapacidade (CERMI) solicitou xa un total de 452.911 firmas, o que implica que xa se obtiveron máis dun 90% do medio millón de apoios que se necesitan para presentar unha Iniciativa Lexislativa Popular (ILP) no Congreso dos Deputados.

 

O dato actualizado deuse a coñecer durante a Asemblea Ordinaria de Representantes do CERMI do exercicio 2015, onde ademais informouse de que se seguen imprimindo pregos de sinaturas polas solicitudes de múltiples organizacións que desexan colaborar nesta iniciativa.

 

Neste sentido, o ministro de Sanidade, Servizos Sociais e Igualdade, Alfonso Alonso, que presidiu o acto de inauguración da Asemblea, manifestou que pese a que non comparte o contido da ILP, abre un debate que ao seu xuízo é "moi oportuno".

 

Reivindicacións perante o Ministro

 

Precisamente aproveitando a presenza do máximo responsable das políticas sociais a nivel estatal o presidente do CERMI, Luis Cayo Pérez Bueno, recoñeceu que Alfonso Alonso "é un amigo do mundo da discapacidade" e agradeceulle que sempre mostrara receptivo coas reivindicacións deste ámbito social.

 

Pérez Bueno tamén manifestou que hoxe o feito de ter unha discapacidade aínda é "un castigo" e lembrou que nunha de cada catro familias hai polo menos un caso de discapacidade. Por iso, o presidente do CERMI pediu que se aborden temas que están "enquistados" desde fai tempo, como é o caso da Lei de Propiedade Horizontal, para conseguir que as persoas con mobilidade reducida poidan entrar e saír libremente das súas casas. "Hai moitas persoas con discapacidade que, por non estar a lexislación actualizada, non poden entrar e saír da súa casa, ou se o fan é en condicións de indignidade", remachou o presidente do CERMI.

 

Así mesmo, insistiu na demanda de que se modifique a Lei Orgánica do Réxime Electoral Xeral para garantir que todas as persoas poidan exercer o seu dereito ao voto, dado que na actualidade unhas 80.000 non poden facelo, o que na súa opinión supón un "anacronismo".

 

Do mesmo xeito, Pérez Bueno lamentou que non se fixo ata o momento nada "enérxico" e "vigoroso" para erradicar o xogo ilegal, o que permite que haxa xente que abuse, explote e se lucre aproveitándose das persoas máis necesitadas. Ademais, pediu que se manteña o que funciona e, xa que logo, que as organizacións do Terceiro Sector poidan seguir xestionando servizos como o viñeron facendo en diferentes Comunidades Autónomas de todas as cores políticas.

 

Sentenza do Supremo

 

Con respecto á sentenza do Tribunal Supremo (TS) do pasado 9 de xuño que anula o Real Decreto 535/2013, de 12 de xullo, polo que se establecen as bases reguladoras para a concesión de subvencións a entidades do Terceiro Sector colaboradoras coa Secretaría de Estado de Servizos Sociais e Igualdade, a partir dun recurso da Generalitat de Cataluña, o presidente do CERMI agradeceu o traballo do Goberno e do ministro Alfonso Alonso para buscar unha solución e non deixar abandonado ao Terceiro Sector.

 

Ao seu xuízo, este feito é "un perigo" para as fontes de financiamento estatal de moitas entidades. Así, insistiu en que se trata de "unha soga ao pescozo que pode poñer en perigo o movemento da discapacidade e pódenos condenar á extinción", e alertou de que as súas sentenzas non son meramente teóricas, senón que teñen un impacto real na vida cotiá das persoas. Por iso, pediu que se salve o financiamento do Terceiro Sector e que ademais de liquidar o problema de face a este ano, se faga tamén de forma duradeira.

 

Por outra banda, durante o desenvolvemento da Asemblea Ordinaria do luns 22 de xuño aprobouse a Memoria de Actividades da Entidade correspondente ao Exercicio 2014, á vez que se deu luz verde ás Contas Anuais da Entidade correspondentes ao pasado exercicio, xunto co seu informe de auditoría, que eleva o Comité Executivo.

 

Para rematar, tamén se aprobou o Plan de Actuación da Entidade para o ano 2015, o Orzamento de Ingresos e Gastos do Exercicio 2015, e a súa Memoria Explicativa, así como o Balance de realizacións en materia de xénero e discapacidade nos seis primeiros meses do Exercicio 2015.

 

*Información extraída da páxina web de FEDACE.