• servizos sarela 795x180

Noticias

COMPOSTELA CO DANO CEREBRAL ADQUIRIDO

COMPOSTELA CO DANO CEREBRAL ADQUIRIDO
  • Esta mañá, con motivo da celebración do Día do Dano Cerebral, organizou unha marcha en Santiago para dar visibilidade ao colectivo. Rematou na Praza do Obradoiro onde persoas con dano cerebral e familiares leron o manifesto reivindicativo.

  • Hoxe o DCA é a primeira causa de discapacidade e dependencia en España. FEDACE estima que 420.000 persoas (35.000 en Galicia) teñen esta discapacidade e cada ano danse 104.000 novos casos, dos que case 7.000 son galegos/as.

  • O movemento asociativo do DCA reclama no seu manifesto medidas para garantir a continuidade asistencial unha vez estas persoas con DCA saen do hospital e evitar o desamparo.

  • O DCA é a lesión repentina no cerebro producida por causas tan diferentes como o ictus (case o 78% dos casos), traumatismos cranioencefálicos, tumores cerebrais, enfermidades infecciosas e outras causas. Hoxe o 65% das persoas con DCA teñen máis de 65 anos.

 

Como cada 26 de outubro Sarela celebra hoxe o Día do Dano Cerebral Adquirido con varias actividades para sensibilizar, reivindicar e dar visibilidade á que é a primeira causa de discapacidade e dependencia en España. FEDACE (Federación Española de Dano Cerebral) estima que máis de 500.000 persoas (35.000 no caso de Galicia) viven con esta discapacidade e cada ano danse 104.000 novos casos, dos que case 7.000 son galegos/as.

O acto principal de celebración foi unha camiñada pola cidade vella de Santiago na que participaron unhas 100 persoas entre persoas con DCA, familiares, amigos/as da asociación así como representantes dos grupos políticos do Concello. A andaina saíu da Alameda ás 11:00 e rematou na Praza do Obradoiro onde se deu lectura ao manifesto redactado polo movemento asociativo para toda España e que se organiza en FEDACE. Despois dos agradecementos trasladados por José Balboa, presidente de Sarela, Ana, Ana Isabel, Jesús, Salomé e Ricardo -persoas con DCA e familiares- puxeron voz e rostro aos principais problemas e reclamacións do colectivo coa súa lectura.

 

Este ano o título do manifesto é “Pódeche pasar a ti, pódelle pasar a calquera” e nel púxose o foco nos problemas que as persoas con DCA e as familias se atopan unha vez saen do hospital. Como di o comezo do manifesto o Dano Cerebral chega de súpeto e “en cuestión de segundos todo cambia”. “Este 26 de outubro -di o manifesto- tamén queremos continuar dando voz a máis de medio millón de persoas con Dano Cerebral e as súas familias, que no noso país xa conviven co Dano Cerebral Adquirido, o DCA. Non somos ‘invisibles’, esta é unha mensaxe de esperanza.”

“Queremos -dí outra parte do manifesto- que teñan a oportunidade de volver marcarse novas metas na vida, conseguir un traballo ou gozar do lecer, porque teñen dereito e porque cremos que unha vida salvada merece ser vivida con dignidade e plenitude”. “Entre todas e todos podemos e debemos lograr que os dereitos de cidadanía das persoas con dano cerebral e das súas familias poidan ser exercidos para que cada vida salvada mereza ser vivida con dignidade. Para iso, consideramos fundamental:

 

  1. Que se desenvolva e impulse unha Estratexia Nacional de Atención ao Dano Cerebral Adquirido que garanta a máxima calidade de vida posible para cada persoa con Dano Cerebral Adquirido e que teña como base a coordinación entre os ámbitos sanitarios e sociais.
  2. Que se cree a categoría diagnóstica ‘Dano Cerebral Adquirido’ á alta do hospital de agudos. Esta categoría debe contribuír a fixar necesidades e criterios de atención para iniciar o proceso de rehabilitación funcional e garantir así a continuidade asistencial.
  3. Que se elabore un censo de persoas con DCA para así analizar as súas necesidades de atención e se dimensionen os recursos necesarios para garantir a súa calidade de vida e inclusión social.
  4. Que se inclúa á familia como parte beneficiaria do proceso de atención, e non só como parte colaboradora, para que tamén reciba a información, formación e apoio psicolóxico que precisa durante todo o proceso de atención ao DCA.
  5. Que nos plans de atención sociais e sanitarios se teñan en conta as necesidades específicas das persoas con maior vulnerabilidade como consecuencia do dano cerebral, como son as persoas con dano cerebral severo, as e os menores con DCA, e as persoas con alteracións graves da conduta; así como das súas familias.

Categorías: Dano Cerebral Adqurido

USO DE COOKIES

Utilizamos cookies propios e de terceiros para mellorar a súa experiencia e os nosos servizos, asi como para mostrarlle no noso website, ou nos de terceiros, publicidade baseada na análise dos seus hábitos de navegación. Se continúa a navegar, consideramos que acepta o seu uso.
Pode obter mais información na nosa Política de Cookies.