Cheo na estrea de 'Sarela en Camiño'

As persoas usuarias da asociación estiveron acompañadas de María Mera e Rubén Riós.

A estrea da obra de teatro 'Sarela en Camiño', que se representou o venres no Auditorio de Galicia, rematou co público en pé nunha gran ovación aos actores e actrices de Sarela. A platea non paraba de aplaudir mentres o actor e director Rubén Riós e a actriz e presentadora María Mera, madriña de Sarela, presentaban ao elenco protagonista: as persoas usuarias da asociación de dano cerebral de Compostela.

'Sarela en Camiño' estreouse o venres, 27 de xuño, na Sala Mozart do Auditorio de Galicia. Tralo discurso do presidente de Sarela, José Balboa, saíu ao escenario a madriña da asociación, María Mera, que fixo un emotivo discurso sobre o seu vínculo coas persoas con dano cerebral adquirido. O seguinte en saír a escena foi Rubén Riós, que axudou a María Mera a introducir o espectáculo teatral.

A obra narra as aventuras de dous peregrinos de camiño a Compostela. Pasan por Corea ou por África, acompañan a outros personaxes nos seus amores e leas, fan paradas técnicas para comer e descansar... e acaban facendo cola na Oficina do Peregrino antes da gran festa de fin de camiño.

A sucesión de escenas estivo salpicada de números musicais. Dous deles contaron co baile do equipo profesional de Sarela e dun grupiño de familiares coidadoras.

O resto de intervencións estiveron apoiadas por traballadoras e unha voluntaria da asociación, que serviron de asistentes e apuntadoras aos actores e actrices de Sarela.

O obradoiro de teatro é unha actividade concibida para reforzar a memoria e a concentración das persoas con dano cerebral adquirido. Ademais, as persoas usuarias de Sarela empregan a obra de teatro para demostrar as súas capacidades en público, traballando e incrementando a súa inclusión social. Aínda que Sarela leva varios anos traballando en obradoiros de teatro, este é o segundo curso que se representa en público o resultado final. O ano pasado estreouse, no mesmo espazo, a obra Sarela Televisión.

Ao remate da obra Rubén Riós e María Mera entrevistaron aos protagonistas de 'Sarela en Camiño', que confesaron os seus nervos ao inicio, e presentaron o conxunto do elenco. O punto final da representación foi o canto coral de 'A saia da Carolina'.

O secretario da asociación, Luciano Fernández, fixo entrega dunha placa de socia de honra e dun ramo de flores a María Mera, e dun detalle elaborado nos obradoiros de Sarela a Rubén Riós. Tamén se fixo un recoñecemento público da voluntaria que traballou na representación teatral e que axudou a preparar 'Sarela en Camiño' desde outubro.

*Fotografía: Diego Espiño