Concedida subvención da Consellería de Sanidade para o programa “Fisioterapia: atención sociosanitaria en persoas con DCA”

O importe da axuda é de 16.000 euros e concedeuse ao abeiro da Orde de 29 de decembro de 2021 pola que se convocaban, en réxime de concorrencia competitiva, as subvencións para entidades privadas sen ánimo de lucro para a realización de programas de carácter sociosanitario en 2022.

O obxectivo deste programa é mellorar a calidade de vida destas persoas a través da intervención das súas capacidades físicas e del beneficiaranse directamente unhas 80 persoas. As persoas beneficiarias son persoas con Dano Cerebral Adquirido que precisen mellorar e/ou manter a súa funcionalidade. Forman parte do programa persoas con DCA, con problemas de mobilidade, sobrepeso, apatía e falla de iniciativa, que deban ter intervención fisioterapéutica para manterse, seguir recuperando e/ou evitar un deterioro físico e na súa saúde xeral.

Este programa desenvólvese en Sarela desde o ano 2002 e está integrado nos Servizos de Atención Especializada (Rehabilitación) e Mantemento e Mellora da Autonomía Persoal e Inclusión Social. O seu grao de satisfacción é moi alto entre as persoas usuarias e, por exemplo, en 2021 o 95% das mesmas declararon estar satisfeitas ou moi satisfeitas co mesmo.

As actividades do programa realizaranse tanto nas instalación de Sarela (sala de fisioterapia, sala de realidade virtual, ximnasio e piscina accesible) como nos propios domicilios, o que facilita o achegamento da atención ás persoas que viven no rural e que por motivos de dispersión xeográfica, secuelas etc non poden acudir directamente.

Neste enlace podes acceder á Resolución publicada no DOG 111 de 10 de xuño de 2022.