Sarela celebra o Día do DCA reclamando medidas que garantan a accesibilidade cognitiva

26/10/2022

Sarela celebrou esta data recibindo a Montse, Enrique, Juan, Marta e Alejandro, os/as cinco persoas con Dano Cerebral, que fixeron a Camiño de Santiago para dar visibilidade ao DCA. No Obradoiro leuse o manifesto reivindicativo. Tamén houbo puntos de información no CHUS e no Hospital da Barbanza (Ribeira).

A conmemoración do Día do Dano Cerebral iniciouse co recibimento no Monte do Gozo a un grupo de persoas con dano cerebral que desde o día 19 percorreron o Camiño de Santiago por parte doutras persoas con DCA, socios/as, profesionais de Sarela e respresentantes públicos. Seguidamente completaron os últimos quilómetros do Camiño nos que se foron sumando máis persoas, en diferentes puntos dependendo das súas capacidades, ata chegar á Praza do Obradoiro. Diante da Casa do Concello leuse o manifesto de todo o movemento asociativo de España e que este ano centrouse en reclamar plans estratéxicos para a accesibilidade cognitiva en contornas sanitarias, xurídicas, educativas e sociais.


As reivindicacións centráronse nos problemas de accesibilidade cognitiva
As secuelas do DCA son variadas e afectan de forma diferente a cada persoa. As secuelas cognitivas (problemas de memoria, atención, planificación, toma de decisións, alteracións da linguaxe, desorientación espacial e temporal etc) supoñen un problema de primeira magnitude no día a día das persoas que as sofren e unha barreira para o acceso a servizos (sanitarios, educativos, sociais...), información, espazos públicos etc.


A lectura do manifesto, co título “Polo cumprimento dos dereitos e por unha necesaria accesibilidade, Mañá pódelo necesitar ti”, foi realizada por catro persoas e familiares con dano cerebral. A presentación do mesmo e benvida ás persoas participantes correo a cargo de José Balboa, presidente de Sarela.


Eugenio de la Torre,  familiar dunha persoa con dano cerebral, iniciou a lectura do manifesto lembrando que para as persoas con DCA “actividades que antes facías sen ningún problema, como usar o transporte público, renovar o pasaporte ou facer unha transferencia bancaria, agora supóñenche un enorme esforzo físico e cognitivo”.


Patricia Fernández, que ten Dano Cerebral, puxo voz ao seguinte fragmento: “A cognición é o que nos permite comprender o mundo que nos rodea: entender a sinalización das rúas ou dos edificios públicos, por exemplo. Grazas á cognición aprendemos, reflexionamos e tomamos decisións. Con todo, unha das secuelas máis frecuentes do Dano Cerebral son as alteracións cognitivas, que fan que recursos e ferramentas que antes formaban parte do noso día a día agora as vexamos como un crebacabezas.”


“Estas dificultades teñen dous responsables: por unha banda, o propio Dano Cerebral Adquirido, que trastorna o funcionamento normal do noso cerebro. E, doutra banda, as administracións ou empresas que non adecúan a información de carteis, servizos ou trámites ás persoas con problemas cognitivos”.


Alejandro Fuentes, persoa con DCA, puxo voz a demandas concretas como demandar que “se cumpran os nosos dereitos e que poidamos facer uso dos recursos públicos en condicións de accesibilidade plena. As persoas con Dano Cerebral Adquirido necesitamos recuperar a nosa funcionalidade nas mellores condicións posibles. Que despois de ter un Dano Cerebral podamos entender as indicacións médicas, cambiar sen dificultade o noso empadroamento ou coller o autobús”.


“Para iso é necesario que existan ferramentas e recursos para o cumprimento e a reivindicación efectiva de dereitos, e tamén que se desenvolvan e executen plans estratéxicos para a accesibilidade en contornas sanitarias, xurídicas, educativas e sociais”.


María José Rama, familiar, leu as reivindicacións xerais que se repiten cada ano: “que se impulse unha Estratexia Nacional de Atención ao Dano Cerebral Adquirido que garanta unha atención coordinada, integral e multidisciplinar; que se elabore un censo completo do número de persoas con Dano Cerebral Adquirido en España; que se cree a categoría diagnóstica “Dano Cerebral Adquirido”, aplicable no momento do alta hospitalaria; que se inclúa á familia como parte beneficiaria do proceso de atención, e non só como parte colaboradora, e que nos plans de atención sociosanitaria se teñan en conta as necesidades específicas das persoas con Dano Cerebral con maior vulnerabilidade, como son as persoas con dano cerebral severo, os e as menores con Dano Cerebral e as persoas con alteracións graves da conduta; así como das súas familias.


Asistencia de representantes públicos e de entidades sociais
A esta xornada asistiron o alcalde de Santiago, Xosé A. Sánchez Bugallo; o reitor da Universidade de Santiago, Antonio López; o director xeral de Persoas con Discapacidade, Fernando González Abeijón; a concelleira de Política Social do Concello de Santiago, Milagros Castro; os representantes dos Grupos Municipais de Santiago Pedro Rey (PP), María Rozas (CA) e Goretti Sanmartín (BNG). Tamén asistiron representantes municipais  de Ames, Boqueixón, Lalín, Lousame, O Pino, Oroso e Vedra, todos concellos que forman parte a área sanitaria de Santiago e Barbanza. Do ámbito social participaron representantes de Cogami, Fademga e Fegadace.


Outras actividades
Como outros anos Sarela tamén tivo presenza durante a mañá no Hospital Clínico de Santiago (de 9:30 a 11:30) e no Hospital da Barbanza en Ribeira (de 9:00 a 11:00) con senllas mesas informativas para sensibilizar sobre o DCA, as súas causas e recursos de atención como é Sarela.


Outra acción que se realizará hoxe á noite é a iluminación en cor azul da fachada da Casa do Concello de Santiago, da sede de Xunta de Galicia en San Caetano, do Parlamento de Galicia, das Torres de Hejduk na Cidade da Cultura de Galicia. Tamén se sumarán a este acto simbólico outros concellos da área sanitaria de Santiago-Barbanza como Ames, Lalín, Boqueixón, Brión e Oroso. A iluminación realizarase nos horarios que establecen as novas medidas de aforro enerxético.

Categorías: Día do Dano Cerebral

USO DE COOKIES

Utilizamos cookies propias e de terceiros para mellorar a súa experiencia e os nosos servizos, así como mostrarlle, desde o noso sitio web ou os de terceiros, publicidade baseada na análise dos seus hábitos de navegación. Se pulsa en aceptar, consideramos que admite o seu uso.
Pode obter máis información na nosa Política de Cookies.

Máis información