María Seguí lembra a “epidemia silente” do DCA por accidentes

O sábado 2 de xuño celebrouse na Coruña o V Foro de Familias onde a DGT recibiu o IV Premio FEGADACE-Miguel Blanco.

Como “epidemia silente” cualificou o sábado 2 de xuño a directora xeral da DGT, María Seguí, a problemática das persoas con dano cerebral adquirido causado por accidentes de tráfico, xa que “as familias quedan subsumidas na atención á persoa accidentada” e deixan de ter tempo para reivindicar os seus dereitos. Durante o seu discurso de agradecemento pola concesión do IV Premio FEGADACE-Miguel Blanco á da Dirección General de Tráfico, Seguí  agradeceu especialmente o labor das asociacións de dano cerebral, precisamente, por darlles voz a esas persoas e familias. Ademais, vinculou o traballo de prevención que realiza a DGT co que se fai desde as asociacións, e reflexionou sobre as cifras de mortalidade ao incidir en que “o número importante é o de persoas con dano cerebral por accidente”.

A Federación Galega de Dano Cerebral fixo entrega do seu galardón anual á DGT esta mañá, durante o V Foro de Familias de Persoas con Dano Cerebral, que está a celebrar no Paraninfo da Universidade da Coruña durante toda a xornada. O acto de entrega do galardón estivo coordinado por Fidel Castro, secretario de FEGADACE, que lembrou o “labor de sensibilización para a prevención dos accidentes, así como a drástica redución da sinistralidade viaria” como motivos para a concesión do premio.

Fidel Castro explicou o cambio de denominación do galardón da Federación, que este ano pasou a chamarse Premio FEGADACE-Miguel Blanco “en homenaxe ao querido neurólogo” falecido repentina e prematuramente o pasado mes de outubro. A súa viúva, Susana Bembibre, expresou o agradecemento da familia polo xesto. Salientou a preocupación de Miguel Blanco por ser próximo ás familias dos seus pacientes, feito no que reside a especial importancia deste recoñecemento por parte das asociacións que reúnen a coidadores e coidadoras.

Seguindo a tradición, o premio foi entregado por Isabel Pérez, directora de Acción Social da Fundación Barrié, que foi a entidade galardoada o ano pasado. Renovou o compromiso da fundación na loita porque “as familias teñan todo o que poidan necesitar” e salientou a expansión do programa ‘Más Social’ a nivel estatal, contando coa Federación Española de Daño Cerebral (FEDACE) como un dos seus aliados de referencia.

Un presidente galego na federación estatal

O recen nomeado presidente de FEDACE, Luciano Fernández, que representa ao movemento asociativo galego (como parte da xunta directiva da Asociación de Dano Cerebral de Compostela Sarela) foi un dos encargados de dirixirse ao público durante o acto de clausura do Foro de Familias. Agradeceu os parabéns dos ponentes e púxose “ao servizo de todos e todas vós, das familias, das asociacións e de todo o tecido asociativo” para levar a Madrid as súas reivindicacións.

José Balboa, presidente de FEGADACE, sucedeuno no uso da palabra para agradecer a todas as familias o seu desprazamento á Coruña e ao conxunto de ponentes a súa implicación. “Precisamos seguir en contacto coas institucións, reforzando o seu apoio” no camiño de obter os recursos necesarios para estender a debida atención a todos os galegos e galegas con DCA. O director xeral técnico da Consellería de Política Social, Javier Abad, que tamén participou no acto en representación do conselleiro, lembrou a continuación o orzamento e recursos destinados este ano ao conxunto de entidades con discapacidade en Galicia. Pola súa banda, a concelleira de Igualdade da Coruña, Rocío Fraga, salientou o impacto económico que ten a discapacidade na familia e a súa intención de construír unha “sociedade coidadora” que poña ás persoas no centro a través da institución que representa.

“Grazas ás familias”

O encontro comezaba ás pasadas as dez e cuarto da mañá coa intervención do vicepresidente da Asociación de Dano Cerebral da Coruña (ADACECO), Juan Luis Delgado, que agradeceu a FEGADACE que levara o Foro de Familias á Coruña e lembrou que as persoas con DCA non son só 35.000, senón moitos miles máis, xa que é unha discapacidade que toca por igual á persoa e á familia. “Sodes as nosas mans, os nosos pés e as nosas cabezas”, concluíu, dirixíndose ás familias asistentes. “Querémosvos”. Foron unhas verbas que repetiu tamén no acto de clausura, no que representou á entidade coruñesa.

A maior parte da mañá estivo centrada no obradoiro sobre ‘Sexualidade e dano cerebral adquirido. Como atender, educar e prestar apoio á sexualidade das persoas con DCA’ que impartiu Natalia Rubio, psicóloga, sexóloga e pedagoga da Asociación Sexualidad y Discapacidad. O enfoque do obradoiro centrouse nunha idea da sexualidade ampla e aberta, comezando polo tratamento da nudez das persoas con discapacidade, cuxos corpos están máis expostos cando se atopan en situación de dependencia (polo aseo, os cambios, etc.). Falou do manexo de condutas na parella na que un dos membros ten DCA e tamén nas relacións con pais/nais ou fillos/as con esta discapacidade, reivindicando o seu espazo de soidade e a comprensión das familias con respecto á súa intimidade.

Tarde de lecer e convivencia

Despois do xantar na cafetería do propio Paraninfo, a actividade continúa cunha ampla programación de lecer e convivencia. As familias asistirán a unha montaxe teatral de improvisación e a un obradoiro de estiramentos durante os que poderán afondar no seu coñecemento mutuo, compartindo as vivencias propias da problemática común convivindo co dano cerebral adquirido.

Nova extraída da web de FEGADACE