Obradoiro sobre DCA organizado pola Escola Galega de Saúde para cidadáns

Será o martes 22 de outubro no Hospital Clínica de Santiago e a inscrición vía internet xa está aberta. Estará impartido por Ana Ruiz, terapeuta ocupacional en Sarela.

A Escola Galega de Saúde para Cidadáns organiza no mes de outubro unha serie de sete obradoiros sobre o dano cerebral adquirido que van estar impartidos por profesionais das asociacións membro de FEGADACE e baseados na súa guía 'Cousas que debes saber sobre o dano cerebral adquirido cando o teu familiar está no hospital', presentada en maio.

O obxectivo desta actividade formativa é mellorar as habilidades e coñecementos das persoas coidadoras, na liña de mellorar tanto a súa situación como familiares de persoas con dano cerebral como de mellorar a atención que finalmente reciben as persoas directamente afectadas. A guía na que se basean, que se repartirá en cada sesión, está ideada para apoiar nos primeiros momentos, mentres a persoa aínda está hospitalizada, proporcionando orientación e referencias para ampliar información, procurar recursos e preparar a volta ao fogar.

Os obradoiros previstos son sete, e terán lugar en cada unha das áreas sanitarias durante o mes de outubro. No caso de Santiago de Compostela, será o martes 22 de outubro de 16:30 a 19:30 no Hospital Clínico (aula 2). A docente será Ana Ruiz, terapeuta ocupacional en Sarela, e desenvolverá o seguinte programa:

• Que é o dano cerebral adquirido? Estados alterados da conciencia.
• Dereitos sanitarios e asistenciais.
• A rehabilitación.
• Estado afectivo e emocional. Comunicación coa persoa afectada.
• Volta ao fogar. Recursos e axudas sociais.

A inscrición xa está aberta, e até o mesmo día do curso, e realízase vía internet neste enlace.