• XSolidaria 2021 png

Noticias

Peche temporal do Servizo de Atención Diúrna Terapéutica debido a gromos de coronavirus

Peche temporal do Servizo de Atención Diúrna Terapéutica debido a gromos de coronavirus

Sarela comunica que, atendendo ás medidas de prevención como consecuencia da evolución da situación epidemiolóxica derivada da COVID-19 no concello de Santiago de Compostela decretadas pola Xunta de Galicia, o Servizo de Atención Diúrna Terapéutica permanecerá pechado até novo aviso.

 

Na resolución da Consellaría de Sanidade publicada no DOG 178-Bis establécese que de acordo co principio de precaución, tendo en conta as específicas exixencias de protección da poboación afectada dada a súa especial vulnerabilidade, os centros de atención diúrna para persoas con discapacidade e os centros ocupacionais, agás para a realización de terapias individuais en domicilios ou centros con cita previa, permanecerán pechados, mentres non se dite resolución da consellería competente en materia de política social que acorde a súa reapertura.

 

Sarela quere trasladar ás persoas usuarias do noso centro de día e súas familias o seu agradecemento pola comprensión e actitude mostrada ante unha medida que frustra as ilusións dun grupo humano que viña de pasar por seis meses de confinamento, distanciamento e estritas medidas de seguridade sanitaria. Nos dous días que estivo aberto o Servizo de Atención Diúrna Terapéutico percibimos claramente a necesidade das persoas usuarias de retomar a súa vida en grupo a pesar das dificultades e esforzo persoal que implica para elas cumprir coas novas normas de saúde.

 

No tempo que duren as novas medidas, o equipo de profesionais manterá contacto directo coas familiar e as persoas usuarias poderán seguir recibindo terapias individuais (fisioterapia, logopedia, psicoloxía, terapia ocupacional etc) no centro con cita previa así como visitas a domicilio co mesmo obxectivo.

 

Sarela sente non ter comunicado antes ás familias as novas medidas da Xunta de Galicia pero a nosa entidade non recibiu ningunha comunicación oficial previa á publicación da mencionada orde no DOG, máis alá das informacións dos medios de comunicación.

 

Sarela lamenta que o peche de servizos esenciais para este colectivo sexa a primeira medida a tomar sen valorar outras alternativas en función da realidade de cada centro. Como xa se expresou noutras ocasións, a vulnerabilidade das persoas con discapacidade non pode ser enfocada só desde a perspectiva dun posible contaxio. Sarela considera que antes de volver a confinar as persoas con discapacidade na súas casas é preciso valorar todas as alternativas que se poden poñer en marcha en cada centro. Neste sentido, ademais de primar e extremar as medidas de seguridade sanitaria, Sarela modificou o uso de espazo do centro para garantir a máxima distancia entre persoas, estableceu a media xornada, atrasou a incorporación das persoas usuarias que non poden usar máscara etc para que o maior número de persoas puideran regresar a un recurso básico nas súas vidas.

 

 

Categorías: Sarela
Tags: COVID-19

USO DE COOKIES

Utilizamos cookies propias y de terceros para mejorar su experiencia y nuestros servicios, así como mostrarle, desde nuestro sitio web o los de terceros, publicidad basada en el análisis de sus hábitos de navegación. Si pulsa en aceptar, consideramos que admite su uso.
Puede obtener más información en nuestra Política de Cookies.

Aceptar Rechazar