Presentación da campaña da X Solidaria

08/04/2022

Hoxe as federacións e redes que representan ao Terceiro Sector galego na loita contra a pobreza e a exclusión social presentaron a campaña da X Solidaria facendo unha chamada á sociedade para que marque o recadro 106 de Actividades de Interese Social na súa Declaración da Renda. No acto leuse o manifesto conxunto das entidades e que se reproduce a continuación.

"Hoxe, 8 de abril, as federacións redes que representamos ao Terceiro Sector galego na loita contra a pobreza e a exclusión social queremos facer unha chamada á sociedade para que, na súa Declaración da Renda, marque o recadro do X Solidario, de Actividades de Interese Social.

 

Este non é un acto nin unha campaña máis. É un chamamento de auxilio para que a posible menor recadación do Imposto da Renda pola crise económica non poña en perigo a supervivencia de programas e organizacións e que agrave a emerxencia sanitaria e social que estamos a padecer.

 

Máis que nunca, é necesario contribuír ao funcionamento das entidades que defendemos os dereitos da cidadanía. Somos un servizo esencial que está na primeira liña loitando contra os catastróficos efectos da pandemia polo COVID-19 e da crise económica e social actual da inflación e a guerra de Ucraína, e que o seguirá a facer cando esta remate.

 

Como sabedes, cada ano a Administración permite que os e as contribuíntes decidan o destino do 0,7% dos impostos que se recadan mediante o IRPF. Cando alguén fai a declaración da renda ten CATRO alternativas:

 

  1. Marcar o recadro de ‘fins sociais’ (“Actividades de Interese Xeral consideradas de Interese Social”) e destinar o 0’7% dos seus impostos para que as entidades de carácter social poidan realizar proxectos coas persoas que máis o precisen.
  2. Marcar os dous recadros: ‘Fins sociais’ e ‘Igrexa Católica’ e destinar deste xeito, o 0’7% dos teus impostos a cada un, é dicir un 1’4%.
  3. Marcar só o recadro da ‘Igrexa Católica’.
  4. Non marcar ningún recadro e que sexa o Estado quen decide o que se fai con ese 0’7%.

 

 

Decidir o que queremos que se faga cos nosos impostos é un dereito que non todo o mundo pon en práctica. O noso obxectivo é que a xente marque o recadro e decida.

 

Marcando o X Solidario, o recadro de ‘Fins Sociais’, NIN pagamos máis NIN imos recibir menos cartos no caso das devolucións e podemos contribuír á realización de programas e proxectos para as persoas en risco de exclusión que máis o precisan.

 

Máis de 12,5 millóns de persoas viven en risco de pobreza a nivel estatal, 694.000 en Galicia. 253.000 destas en pobreza severa. Persoas maiores, sen fogar, con discapacidade, enfermas de cancro, mulleres vítimas de violencia machista, nenos e nenas, desempregadas...

 

Grazas ás persoas que marcaron o X Solidario, no 2021 141 organizacións de acción social de toda Galicia levaron a cabo mais de 500 proxectos que beneficiaron de xeito directo a un mínimo de 105.000 persoas.

 

No 2021 conseguimos que case seis de cada dez galegos e galegas marcaran o recadro do X Solidario, oito mil mais que no ano anterior. Recadáronse case vinte millóns de euros, dous mais que no ano anterior (1).

 

Se os 610.363 galegos e galegas que non o fixeron marcaran o X Solidario, teríanse recadados case 13 millóns de euros máis (2).

 

No 2021, 312.794 contribuíntes marcaron o recadro do X Solidario, 3.099 mais que no ano anterior. Recadáronse 9.256.075€, 231.702,00€ mais que no 2020. Se os 265.607 contribuíntes da provincia da Coruña marcaran o X Solidario, teríanse recadados no 2021 6.630.670€ máis. Un total de 15.886.744€

 

A estas persoas nos diriximos especialmente para lembrarlles que:

  • Marcar o X Solidario non custa nada. Nin pagas máis, nin che devolverán menos.
  •  
  • Se xa marcas a casiña da Igrexa, marcando tamén a de ‘Actividades de Interese Social’, poderás axudar o dobre.

 

Ti decides que o 0,7% dos impostos se destine integramente a programas desenvoltos polas ONG, coa máxima transparencia na súa xestión a través das diferentes convocatorias da Xunta de Galicia: Política Social, Igualdade e Sanidade. A Xunta de Galicia lle reclamamos unha vez mais que reduza a burocracia o máximo posible e unifique todas as convocatorias nunha soa.

 

Grazas de novo á cidadanía galega por sumarse a esta emerxencia solidaria e garantir que, coa súa axuda, poidamos seguir avanzando".

 

(1) Concretamente, no 2021, 744.082 contribuintes marcaran o recadro do X Solidario, 8.377 mais que no ano anterior. Recadáronse 19.635.313 €, 342.930 € mais que no 2020.

(2) Se os 610.363 galegos e galegas que non o fixeron marcaran o X Solidario, teríanse recadados no 2021 12.905.500€ mais. Un total de 32.540.813€

 

 

Categorías: Sarela , Terceiro sector
Tags: X Solidaria
Compartir en:

USO DE COOKIES

Utilizamos cookies propias y de terceros para mejorar su experiencia y nuestros servicios, así como mostrarle, desde nuestro sitio web o los de terceros, publicidad basada en el análisis de sus hábitos de navegación. Si pulsa en aceptar, consideramos que admite su uso.
Puede obtener más información en nuestra Política de Cookies.

Aceptar todas Configurar Cookies Más información