Presentación de ArousaMan no Concello de Ribeira

Un grupo de seis nadadores vai cruzar este sábado 25 xullo as augas da ría de Arousa entre O Grove e Ribeira nunha iniciativa que, baixo a denominación de ArousaMan, ten por obxectivo visualizar o dano cerebral adquirido e a situación de dificultade que atravesan as persoas con esta discapacidade e as súas familias.

 

A actividade foi presentada esta mañá na Casa Consistorial de Ribeira nun acto que contou coa participación do ribeirense Juan Ramón Martínez, promotor e organizador da iniciativa; Concha Otero e Rocío García, vicepresidenta e directora -respectivamente- da asociación Sarela (Asociación de Dano Cerebral de Compostela), e Sabela Pensado, campioa de triatlón en distancia olímpica, quen será unha das valentes que participen no reto. No nome do Concello compareceu o edil Víctor Reiriz.

 

O inspirador desta cita é Manolo Martínez, un irmán de Juan Ramón que ten dano cerebral adquirido derivados dun neuronoma acústico. O propio Juan Ramón manifestou que se quixo buscar un evento deportivo que tivese unha especial dureza para tratar de simbolizar as dificultades que atravesan as familias e persoas con dano cerebral, así como para reclamar máis apoio das institucións.

 

Concha Otero declarou que para a asociación Sarela é unha honra poder colaborar nesta iniciativa e sumouse ao desexo de que se presten máis medios. “Unha vida salvada merece ser vivida o máis dignamente posible”, afirmou. 

 

Pola súa parte, Víctor Reiriz expresou a satisfación do Concello en poder axudar ao desenvolvemento de iniciativas tan cheas de humanidade como esta; mentres que Sabela Pensado agradeceu á organización que quixesen contar con ela nesta causa solidaria.

 

Está previsto que os participantes partan en torno ás 8:30 horas do Grove para percorrer os 13 quilómetros (entre 12.000 e 13.000 brazadas) que separan ambas bandas da ría de Arousa. Cóntase coa colaboración entre outras entidades da Asociación Galega de Kayaks de Mar. 

 

Chegada a Coroso

 

A chegada a Ribeira está prevista para entre as 14:00 e as 14:30 horas. Farao na praia de Coroso á altura do posto dos socorristas, co acompañamento dun nutrido grupo de nadadores que se van sumar nos últimos metros de travesía.

 

Xa alcanzada a meta, agárdase que os poida recibir Manolo Martínez ou, de non ser posible, familiares de persoas con dano cerebral adquirido.

 

Xunto a Sabela Pensado e ao propio Juan Ramón Martínez, os outros nadadores de AsousaMan serán José Hachero, Bruno Vázquez, Bernardo Sobrido e José Manuel Lorenzo.

 

*Información elaborada polo Concello de Ribeira.