Sarela formará aos profesionais de OCA Hotels na prevención do Dano Cerebral Adquirido

03/02/2022

O director do hotel OCA Puerta del Camino, Lalo Crespo, tamén fixo entrega esta mañá da recadación de 656,00 euros acadada no acendido solidario realizado nas instalacións do establecemento en Nadal, a Sarela, Asociación de Dano Cerebral de Compostela, representada pola súa vicepresidenta, Concha Otero, e o secretario, Luciano Fernández Pintor.

Concha Otero agradeceu en nome de Sarela a colaboración de Oca Hotels pois sobre todo axuda a dar visibilidade social ao Dano Cerebral. Sarela destinará esta doazón para o equipamento da terraza exterior do seu centro, que permitirá ás persoas usuarias de todos os servizos e familiares ter un espazo de descanso e desfrute, onde tamén desenvolver actividades que serven de espazo de encontro e relación.

 

Formación para profesionais

Así mesmo Sarela proporcionará formación aos profesionais da compañía hoteleira enfocada á prevención do Dano Cerebral Adquirido causado por ictus, traumatismos cranioencefálicos en accidentes de tránsito, laborais, tumores cerebrais, etc. Nesta formación tamén se falará de aspectos xerais do DCA como son a súas secuelas e dos servizos que presta a entidade.

 

Desde a dirección do OCA Puerta del Camino recordan que “a colaboración con entidades que traballan con colectivos vulnerables é parte da filosofía do noso hotel e ademais é un compromiso de toda a cadea OCA. Estamos moi orgullosos do éxito e da participación dos nosos amigos e veciños de Santiago e arredores no noso acendido solidario de Nadal. Ademais, esta acción formativa, que estenderemos ao persoal de OCA Hotels a través de participación virtual, permitiranos coñecer de primeira man o labor que desenvolven en Sarela e as consecuencias do dano cerebral,como previlo, pero sobre todo valorar que unha determinada limitación non exclúe. Recoñecer e promover a inclusión é responsabilidade de todos”, sinalou Crespo.

 

Categorías: Sarela

USO DE COOKIES

Utilizamos cookies propias e de terceiros para mellorar a súa experiencia e os nosos servizos, así como mostrarlle, desde o noso sitio web ou os de terceiros, publicidade baseada na análise dos seus hábitos de navegación. Se pulsa en aceptar, consideramos que admite o seu uso.
Pode obter máis información na nosa Política de Cookies.

Máis información