Sarela visita a Fundación Eugenio Granell

Once das persoas usuarias de Sarela achegáronse esta mañá ao céntrico Pazo de Bendaña, en Compostela, para visitar o museo e sede da Fundación Eugenio Granell. Deron unha volta pola cidade e apreciaron o traballo do pintor surrealista.

 

Os usuarios e usuarias de Sarela beneficiáronse dunha visita guiada, na que lles explicaron, como se ve na imaxe, o traballo do pintor. Recibiron información sobre os principais rasgos da súa obra pictórica, algunhas nocións sobre o surrealismo, a corrente que inspira as composicións do pintor e escritor, e oíron sobre a vida de Granell, que estivo exiliado ata dez anos despois da morte de Franco.

 

Esta saída forma parte do ciclo que cada venres leva a un grupo de usuarios e usuarias do centro de día a unha visita cultural, paseo ou actividade de lecer, e que habitualmente Sarela emprega para estar ao tanto das exposicións que hai na cidade.