Seis asociacións acompañan a Sarela na súa xornada deportiva

Sesenta persoas participantes, acompañadas de 23 profesionais, asistiron onte á Xornada de Deporte Adaptado que Sarela organizou con motivo do Día Internacional da Discapacidade. As persoas convidadas pasaron a mañá no Pavillón do Restollal probando diferentes disciplinas deportivas adaptadas: boccia, pádel adaptado e xogos populares.

 

Os deportes practicáronse de maneira simultánea, e os grupos asistentes mesturáronse e rotaron entre as tres actividades. Ao fondo do pavillón sitouse ASPADO (Asociación Pádel para Todos), que contou coa colaboración da empresa de material deportivo Softee para guiar a actividade de pádel adaptado. Na parte central despregáronse os xogos populares: as persoas asistentes puideron probar diferentes actividades co paracaídas, os aros e o diábolo. Por último, no campo de boccia Sarela contou coa colaboración do equipo de Alento (a Asociación de Dano Cerebral de Vigo), que leva texpo experimentando con este deporte.

 

A xornada contou coa colaboración do Concello de Santiago de Compostela, que cedeu as instalacións. A concelleira de Benestar e Deportes, María José Corral, achegouse a media mañá ao Pavillón do Restollal para ver de preto a actividade.

 

Ademais das persoas usuarias de Alento, asistiron ao encontro membros de Agadea (asociación de Alzheimer), Aspanaes (autismo), Aspas (discapacidade intelectual), Fonte da Virxe (enfermidade mental) e AMICO (discapacidade física).