Educa V: proxecto para coidar das persoas coidadoras

Sarela participa desde hai uns meses neste proxecto de investigación de Red Menni de Daño Cerebral de Hermanas Hospitalarias que busca desenvolver ferramentas de intervención para previr e reducir a sobrecarga das persoas coidadoras doutras con dano cerebral.

As persoas que atenden a un familiar con DCA poden verse expostas á sobrecarga debido á cronicidade desta discapacidade e en moitos casos polas complexas secuelas que implica. Os coidadores e coidadoras xogan un papel fundamental na recuperación das persoas con DCA e soen ser os encargados de axudarlle a manexar as actividades da vida diaria, como poden ser o autocoidado, a alimentación, realizar trámites etc. É coñecido que as persoas coidadoras teñen máis risco de experimentar problemas de saúde física e psíquica, así como illamento social e o desgaste económico.

O proxecto Educa V é un traballo de investigación que nace no seo de Hermanas Hospitalarias en áreas como a psicoxeriatría e que agora quere adaptarse ao dano cerebral adquirido e, concretamente, a atender as necesidades dos familiares que coidan a unha persoa con DCA.  Sarela colabora, xunto con outras entidades e profesionais, na avaliación da eficacia do programa de intervención deseñado para previr e reducir a sobrecarga do coidador/coidadora e que até agora traballou nos ámbitos do alzhéimer, esquizofrenia e discapacidade intelectual con trastornos do comportamento. Trátase dun protocolo de intervencións con duración e con todos os obxectivos específicos das sesións xa definidos.

Nestes momentos estase a facer o estudio, no que participan as persoas coidadoras, para valorar se esa intervención estandarizada é eficaz para reducir a carga que teñen. Para ilo, tras realizar unha avaliación inicial sobre si mesmos e seus familiares con DCA, os coidadores/as recibirán unha intervención en grupo que consta de dez sesións, co obxectivo de axudalos a controlar a tensión e estrés derivado do coidado, ensinarlle diferentes estratexias para manexar os problemas de comportamento do familiar e aumentar o seu grado de satisfacción na vida. Ao finalizar a intervención, repítese a avaliación inicial para ver se houbo cambios. Aos nove meses realizarase novamente para comprobar se estes se manteñen no tempo.