FEGADACE organiza o día 30 o seu IV Foro de Familias

20/05/2015

A Federación Galega de Dano Cerebral ergue a súa voz "contra o copagamento confiscatorio".

A Facultade de Ciencias Económicas e Empresariais da Universidade de Santiago de Compostela (USC) vai ser o escenario, o sábado 30 de maio, do IV Foro de Familias de Persoas con Dano Cerebral Adquirido (DCA). A Federación Galega de Dano Cerebral (FEGADACE) súmase á campaña do CERMI (Comité Estatal de Representantes de Persoas con Discapacidade) pola reforma da Lei de Dependencia dedicando os contidos deste Foro de Familias ao lema 'Non ao copagamento confiscatorio'.
 
Este ano acádase o cuarto Foro, un encontro pensado para a posta en común das necesidades e preocupacións das familias das persoas con dano cerebral adquirido no que se analiza a evolución das asociacións, se intercambian experiencias de traballo e se recibe formación especializada para a atención da problemática relacionada co DCA. Aínda que ata o de agora se facía coincidir o encontro co Día do Dano Cerebral (26 de outubro), FEGADACE decidiu separar ambas datas para poder centrar a atención e dar un maior protagonismo ao Foro de Familias.
 
O programa de traballo deste IV Foro de Familias comeza ás 9:30, coa recepción e entrega de documentación. Ás 10:00 o presidente de FEGADACE, José Balboa, lerá o discurso de apertura, para, ás 10:15, mergullarse de cheo no programa cunha mesa redonda sobre 'Como nos afecta o copagamento?'. Interveñen nela a presidenta da Federación Española de Daño Cerebral (FEDACE), Amalia Diéguez, e o presidente da Asociación de Pacientes do CHUS, Fernando Abraldes. Encárgase de moderar Luisa Ramírez, vicepresidenta de FEGADACE.
 
Ás 11:15 farase entrega do III Premio FEGADACE á Fundación Barrié. Para o acto, conducido polo secretario da Federación, Fidel Castro, contarase con Miguel Blanco, coordinador da Unidade de Ictus do CHUS e II Premio FEGADACE. Recollen o galardón o Director Xeral da Fundación Barríé, Javier López, e a súa Directora de Acción Social, Mª Isabel Pérez.
 
Trala entrega realizarase unha pausa. O programa retómase ás 12:00 coas persoas asistentes divididas en catro grupos de traballo nos que recibirán unha formación e asesoramento máis directo e próximo sobre 'Curatela', 'Alimentación, saúde e hixiene das persoas con DCA', 'Achegamento (baseado na filosofía da estimulación basal)' e 'Manexo de condutas difíciles'.
 
Ao finalizar a sesión dos grupos de traballo, as persoas asistentes ao Foro de Familias gozarán dun zantar de confraternidade na cafetería da Facultade de Económicas.
 
A Fundación Barrié recolle o III Premio FEGADACE
 
A Federación Galega de Dano Cerebral decidiu entregar o III Premio FEGADACE á Fundación Barrié “polo seu labor de apoio ao movemento asociativo do dano cerebral adquirido, que respaldou desde unha fase incipiente contribuíndo ao seu fortalecemento institucional e á visibilización das asociacións membro de FEGADACE e da discapacidade que representan, e axudando a incrementar a dimensión e a consolidar programas e servizos para a mellora da calidade de vida das familias e persoas con DCA”.
 
Esta entidade leva anos respaldando a través de diferentes programas, entre os que salienta 'Más Social', o labor das asociacións de FEGADACE. A Fundación Barrié leva demostrado unha aposta decidida polo desenvolvemento e fortalecemento das asociacións de dano cerebral adquirido, contribuíndo, desde os ámbitos da formación, da consultoría e do apoio á contratación, a que as asociacións poidan mellorar a calidade de vida das persoas con DCA con máis e mellores proxectos e servizos.
 
Iniciativa Lexislativa Popular 'Non ao copagamento confiscatorio'
 
O CERMI, do que fai parte FEGADACE, é a entidade de referencia de representación das persoas con discapacidade a nivel estatal. Este organismo está inmerso desde xaneiro nunha campaña de recollida de sinaturas que respalden a Iniciativa Lexislativa Popular (ILP) 'Non ao copagamento confiscatorio' pola reforma da Lei de Dependencia.
 
A principal reclamación desta ILP é que se establezan uns criterios xustos de copagamento que non expulsen ás persoas en situación de dependencia da protección social. É a resposta do movemento asociativo da discapacidde ás políticas de recortes, que crearon unha situación insostíbel que fai recaer o esforzo económico do mantemento do sistema de atención á dependencia nas propias persoas nesa situación e nas súas familias.
 
FEGADACE aproveitará o Foro de Familias para recoller sinaturas que respalden a Iniciativa Lexislativa Popular, para garantir que poida ser admitida para o seu debate no Congreso.
 
*Información extraída de FEGADACE.
 
pdf
  • Programa do IV Foro de Familias
  • Programa que recolle os contidos do IV Foro de Familias de FEGADACE (30/05/2015).

  • Baixar ficheiro
    Cartel do IV Foro de Familias
Tags: familias
Compartir en:

USO DE COOKIES

Utilizamos cookies propias e de terceiros para mellorar a súa experiencia e os nosos servizos, así como mostrarlle, desde o noso sitio web ou os de terceiros, publicidade baseada na análise dos seus hábitos de navegación. Se pulsa en aceptar, consideramos que admite o seu uso.
Pode obter máis información na nosa Política de Cookies.

Aceptar todas Configurar Cookies Máis información